ප්‍රගීත් ඉස්සුවේ “හමුදාවේ විෂ වායු ප්‍රහාර ගැන සොයමින් සිටියදීයි”| VIDEO

 

උතුරේ දියත් කළ යුද්ධයේදී ශ්‍රී ලංකා රජයේ හමුදාව විෂ සහිත වායු රැගත් අවි යොදාගෙන ජාත්‍යන්තර නීති උල්ලංඝනය කරමින් පහර දීම ගැන ඉතා වේදනාවෙන් යුතුව ගවේෂණය කරමින් සිටියදී මාධ්‍යවේදී ප්‍රගීත් එක්නැළිගොඩ අතුරුදහන් වු බව නව සම සමාජ නායකයා පවසයි.

ඔහුගේ අතුරුදහන් වීම සිදු කරන ලද්දේ හමුදාව විෂ සහිත වායු භාවිතා කරමින් යුද්ධ කරන බවට සාක්ෂි රැගත් ලියකියවිලිද සමග බවයි ආචාර්ය වික්‍රමබාහු කරුණාරත්න පවසන්නේ.

ඔහු ඒ බව පවසා සිටියේ “එක්නැලිගොඩ මතක ආවර්ජනා” යනුවෙන් 24 අඟහරුවාදා පස්වරුවේ කොළඹ ජාතික පුස්තකාල හා ප්‍රලේඛන සේවා මණ්ඩල ශ්‍රවනාගාරයේ පැවැති සැමරුම් සභාවක් අමතමිනි.

“එක්නැලිගොඩ මතක ආවර්ජනා” සංවිධානය කර තිබුනේ එක්නැලිගොඩ මිතුරෝ සමගින් ජාතික විද්වත් මණ්ඩලය විසිනි.

මාධ්‍යවේදී ප්‍රගීත් එක්නැළිගොඩ හත් අවුරුද්දකට පෙර පැහැරගෙන ගොස් රඳවා තබා ගත් ස්ථාන මෙන්ම එයට සාපරාධී ලෙස හවුල් වූ නිලධාරින් කවුරුන්ද යන්නත් මේ වන විට අනාවරණය වී ඇතත් ඔහුගේ අතුරුදහන්වීම විනිශ්චයක් කරා ගෙන යාමට නොහැකි වී තිබීම ගැටලු සහගත බවයි ආචාර්ය වරයා එහිදී පෙන්වා දුන්නේ.

ඉහලින් තීන්දුවක්

එය අධිකරණයේ පවතින දුර්වලකමක් ද නොඑසේ නම් පැහැරගත් පිරිස් ඔහු මරා දමනු ලැබුවේ යුද්ධයේ අවශ්‍යතාවයට අනුව අපරාධිකාරී යුද්ධයක් සිදු කරගෙන යාමේදී එය හෙලි දරවි කිරිමට යන පුද්ගලයාට විරුද්ධව කටයුතු කිරීමේදී ඒ සම්බන්ධයෙන් සොයා බලා පියවර නොගන්නා බවට “ඉහලින් තීන්දුවක්” ගෙන තිබීම නිසාදැයි පැහැදිලිවම කතා කරන්නට සිදු වන බවයි ආචාර්ය වික්‍රමබාහු කරුණාරත්න එහිදී දැඩිව අවධාරණය කර සිටියේ.

සාපරාධී ක්‍රියා සිදු කරමින් රටේ ගෙන ගිය යුද්ධයට එරෙහිව කටයුතු කිරීම නිසා මාධ්‍යවේදී ප්‍රගීත් එක්නැළිගොඩ සහ මාධ්‍යවේදී ලසන්ත වික්‍රමතුංග මරා දැමු බව පෙනෙන්නට ඇති බව දීර්ඝ කාලයක් තිස්සේ යුද විරෝධී දේශපාලනයක නිරත වාමාංශික නායකයා එහිදී සඳහන් කළේය.

එම ඝාතන අමතක කර දැමිය හොහැකි අතර කෙලෙස හෝ එම ඝාතන සිදු කරනු ලැබුවේ කවුරැන්දැයි සොයා ගත යුතු බවද ඔහු දැඩිව අවධාරණය කළේය.

 

 

දෙපැත්තේම “රණ විරුවෝ”

රටේ ගෙන ගිය යුද්ධය අභාග්‍ය සම්පන්න යුද්ධයක් මෙන්ම රටට විනාශයක් ගෙන ආ යුද්ධයක් ලෙස හදුන්වා දෙන ආචාර්ය වික්‍රමබාහු කරුණාරත්න එහිදී පවසා සිටියේ යුද්ධයේ වීරයන් ලෙස පිරිසක් හදුන්වා ගැනීම ලැජ්ජා විය යුතු කරුණක් බවයි.

යුද්ධය ඇති කර ගැනීමම විශාල විනාශයක් ලෙස විග්‍රහ කළ ඔහු තවදුරටත් පැහැදිලි කළේ යුද්ධයේ වීරයන් සිටිනම් යුද්ධ කළ දෙපාර්ශවයෙන්ම වීරයන් සිටිය යුතු බවයි.

කෙසේ නමුත් යුද්ධය තුල එක් වීරයකු ලෙස ආචාර්ය වික්‍රමබාහු කරුනාරත්න හදුන්වා දුන්නේ අගමැති රනිල් වික්‍රමසිංහයි.

සියලු ප්‍රශ්න වලට මුහුණ දී එල්.ටී.ටී.ඊ සංවිධානයේ නායක වේලුපිල්ලේ ප්‍රභාකරන් සමග ගිවිසුම් අත්සන් කර සාපරාධි විෂ වායු භාවිත කරමින් සිදුකළ යුද්ධය නතර කිරීමටත් රටේ ලේ ගංගාවන්, කදුලු ගංගාවන් නැවැත්වීමට ඉදිරිපත් වු නායකයකු වන ඔහු වීරයෙක් ලෙස සලකන බවයි නව සම සමාජ නායකයා එහිදී අවධාරණය කළේ.

රනිල් මහාවංශයට

යුද්ධයක් නතර කිරීමට එඩිතර පියවරක් ගැනීම ඉතිහාසයට එක්වන අතර එය මහ වංශයට යා යුතු කරුණක් ලෙසද ඔහු සඳහන් කළේය.

දෙමළ ජනතාවට වද හිංසා කර මරා දැමීමට සිංහලයකු ලෙස විරුද්ධ වීම නිසා මාධ්‍යවේදී ප්‍රගීත් එක්නැළිගොඩ ද වීරයෙක් වන බව කී ආචාර්ය වික්‍රමබාහු කරුණාරත්න වැඩි දුරටත් අවධාරණය කළේ ඔහුට එරෙහිව සාපරාධී ආකාරයෙන් කටයුතු කිරීම සම්බන්ධයෙන් සෙවීම ඉතිහාසයේ කවර හෝ දිනක සිදු කිරීම අනිවාර්ය බවයි.
මාධ්‍යවේදී ප්‍රදීප් එක්නැලිගොඩ කොළඹට තදාසන්න ප්‍රදේශයකදි පැහැර ගෙන ගොස් අතුරුදහන් කරනු ලැබුවේ 2010 ජනවාරි මස 24 වැනි දිනයි.

ඔහුගේ පැහැරගැනීමට සැක පිට අත්අඩංගුවට පත් යුද හමුදා නිලධාරීන් යලි සේවයේ පිහිටුවා ඇත්තේ ජනමාධ්‍යයට එරෙහිව භීෂණය මුදා හළ පුද්ගලයන්ට එරෙහිව දඩුවම් ලබා දෙන බවට මැතිවරණ පොරොන්දු ලබා දෙමින් බලයට පත් ජනාධිපති මෛත්‍රීපාල සිරිසේන බවට දිවයිනේ ප්‍රමුඛතම ජනමාධ්‍ය සංගමයක් පසුගියදා චෝදනා කර තිබුණි.

 

Related posts

Comments are closed.

Top