ඩොලර් මිලයන ගණනක මුල්‍ය වංචාවකට සැක පිට ලිට්රෝ ගෑස් ලොක්කා අත්අඩංගුවට

තායිවානයේ ඊස්‌ටන් ඉන්ටර්නැෂනල් බැංකුවෙන් ඇමෙරිකානු ඩොලර් මිලියන ගණනක මූල්‍ය වංචාවක්‌ සිදුකළ බවට සැක කරමින් ලිට්‌රෝ ගෑස්‌ සමාගමේ සභාපති ශලීල මුණසිංහ අපරාධ පරීක්‌ෂණ දෙපාර්තමේන්තුව සඳුදා (09 දා) අත්අඩංගුවට ගෙන තිබේ.

තායිවානයේ ඊස්‌ටන් ඉන්ටර්නැෂනල් බැංකුවේ ගිණුමකට අනවසරයෙන් ඇතුළුවී එහි රහස්‍ය දත්ත වෙනස්‌කර ඩොලර් මිලියන 60 ක පමණ මුදලක් වංචාවක්‌ කළැයි ඔහුට විරුද්ධව චෝදනා ගොනුකර ඇත. අත්අඩංගුවට ගත් ලිට්‌රෝ ගෑස්‌ සමාගමේ සභාපතිවරයා සඳුදා (09 දා) රාත්‍රියේ අපරාධ පරීක්‌ෂණ දෙපාර්තමේන්තුවේ මූලස්‌ථානයට රැගෙන ගොස් ඇති අතර මේ සම්බන්ධයෙන් ඔහුගෙන් දීර්ඝ ලෙස ප්‍රශ්න කිරීමට කටයුතු කර තිබේ.

ඒ අනුව ශලීල මුණසිංහ අද (10 දා) අධිකරණය වෙත ඉදිරිපත් කිරීමට නියමිතව තිබුණි.

සැකකාර මුණසිංහ සහ එම මහා පරිමාණ මුදල් වංචාවට සම්බන්ධ ඉන්දියන් ජාතිකයන් කිහිප දෙනකු ඇතුළු කණ්‌ඩායමක්‌ වංචා කරන ලද මුදල් කොළඹ පිහිටි ප්‍රධාන පෙළේ හෝටලයකදී බෙදා ගෙන ඇති බව අපරාධ පරීක්‌ෂණ දෙපාර්තමේන්තුව සිදු කළ මුලික පරීක්ෂණ වල දී අනාවරණය වී ඇති බව එම දෙපාර්තුමේන්තුව පවසයි.

මෙම මුදල්වලින් ඩොලර් මිලියන 2.5ක්‌ මෙරට තිදෙනෙකුගේ ගිණුම්වලට ද බැරවී තිබී පොලිසිය සොයාගෙන ඇති අතර ලිට්රෝ සමාගමේ සභාපතිවරයාගේ ගිණුමට අමෙරිකානු ඩොලර් මිලියන 1.1ක් සම්ප්‍රේෂණය වී තිබේ. මෙසේ මෙරට බැංකුවක ගිණුමකට පැමිණි මුදල්වලින් ඩොලර් ලක්‍ෂ දහතුනක්‌ පමණ ලබාගෙන තිබූ අතර තවත් ඩොලර් දසලක්‍ෂයක මුදලක්‌ බැංකු ගිණුමට බැරව තිබියදී පොලිසිය විසින් අත්හිටුවා තිබේ.

එසේම මෙම කරුණ සම්බන්ධයෙන් මීට පෙර අත්අඩංගුවට ගෙන බන්ධනාගාරගත කළ හිටපු ජ්‍යෙෂ්ඨ හමුදා නිලධාරියාගේ පුත්‍රයා සහ අනෙක් සැකකරු බදාදා (11 වැනිදා) අධිකරණය වෙත ඉදිරිපත් කිරීමට නියමිතය.

සැක කටයුතු මුදල් ප්‍රේෂණ

තායිවානයේ ඊස්‌ටන් ඉන්ටර්නැෂනල් බැංකුව හරහා ලංකා බැංකුවේ ගිණුමකට ඇමෙරිකානු ඩොලර් මිලයන 1.2 ක මුදලක් බැරවීම සහ සැක පිට අත්අඩංගුවට ගත් පුද්ගලයෙක් එම මුදල් වලින් ප්‍රමාණයක් ගිණුමෙන්ලබා ගැනීම සම්බන්ධයෙන් සැක මතුව ඇති අතර ලංකා බැකුවේ නිලධාරීන් මේ ගනුදෙනුව පිළිබඳව ශ්‍රී ලංකාවේ අපරාධ පරීක්ෂණ දෙපාර්තුමේන්තුවට ඔත්තුවක් ලබා දී ඇත.

මුල්ම සැකකරු පොලිසිය විසින් අත්අඩංගුවට ගෙන ඇත්තේ ඇමරිකානු ඩොලර් 26000ක් ආපසු ගැනීමට උත්සහ කිරීමේදී යි. එම මුදල ඔහුගේ ගිණුමට ප්‍රේෂණය වී ඇත්තේ ඉකුත් (06) සිකුරාදායි.

” සැක කටයුතු ගනුදෙනුවක් පිළිබඳව ලංකා බැංකුව අපට දැනුම් දුන්නා. ඒ හා සම්බන්ධ දෙදෙනෙක් ව අත්අඩංගුවට ගත්තා” අපරාධ පරීක්ෂණ දෙපාර්තුමේන්තුවේ අධ්‍යක්ෂ ශානි ජයවර්ධන පවසයි. ලිට්රෝ සමාගමේ සභාපතිවරයා මෙම සිද්ධිය සම්බන්ධයෙන් පොලිස් අත්අඩංගුවට පත් තෙවන්නායි.

ජාත්‍යන්තර ප්‍රේෂණය

තායිවානයේ ඊස්‌ටන් ඉන්ටර්නැෂනල් බැංකුවේ සිදුව ඇති මෙම මුල්‍ය වංචාවේ මුදල් ශ්‍රී ලංකාව, කාම්භෝජය , ඇමෙරිකාව යන රටවලට ප්‍රේෂණය කිරීම සඳහා ජාත්‍යන්තර මුදල් සංසරණ සමාගමක් වූ ‘ස්විෆ්ට් ‘ හරහා සිදුකර ඇති අතර එම සමාගම වෙතද චෝදනා එල්ල වී තිබේ.

මුල්‍ය වංචාව හේතුවෙන් අහිමි වුනු මුදල්වලින් වැඩි ප්‍රමාණයක් නැවත සොයා ගැනීමට ඊස්‌ටන් ඉන්ටර්නැෂනල් සමත්ව තිබේ.

තායිවානයේ බැංකු කාර්යාංශයේ නියෝජ්‍ය අධ්‍යක්ෂ ෂෙරී චුආන් ප්‍රකාශ කර ඇත්තේ කාම්භෝජයට ප්‍රේෂණය කරනු ලැබූ ඇමෙරිකානු ඩොලර් මිලියන 57 ක් නැවත සොයා ගැනීමට ඊස්ටන් බැංකුවට හැකියාව් ලැබී ඇති බවයි. ඇමරිකානු ඩොලර් මිලියන 1ක් ඇමරිකාවටද ඇමරිකානු ඩොලර් මිලියන 1.5ක් ශ්‍රී ලංකාවට ද යවා තිබේ. තවත් ඇමෙරිකානු ඩොලර් ලක්ෂ 5ක් පිළිබඳව තොරතුරු වාර්තා වී නැත .

මෙය හුදකලා සිදුවීමක් බවත් එමඟින් බැංකුවේ අනෙක් ගනුදෙනුකරුවන්ට බලපෑමක් නැති බව එම බැංකුව පවසයි. අදාල සිදුවීම පිළිබඳව බැංකුව තායිවානයේ මුල්‍ය සුපරීක්ෂා කමිටුව වෙත දැනුම් දී තිබු අතර ඔවුන් ක්ෂණිකව ජාත්‍යන්තර අපරාධ පොලිසිය දැනුවත් කර තිබේ.

Related posts

Comments are closed.

Top