රටේ උසස්ම ආරක්ෂක නිලධාරියා අත් අඩංගුවට ගැනීමට උසාවියෙන් අවසර

පුද්ගලයන් පිරිසක් අතුරුදහන් කිරීම සම්බන්ධයෙන් සැක කෙරෙන නාවික හමුදා නිලධාරියකුට උසාවියෙන් වසං වී සිටීමට උදව් කිරීමේ චෝදනාවට  ශ්‍රී ලංකාවේ සේවයේ නියුතු ඉහලම ආරක්ෂක සෙන්පතියා අත් අඩංගුවට ගැනීමට අධිකරණය අවසර දී තිබේ.

කොටුව මහේස්ත්‍රාත්වරිය විසින් එම අවසරය දී ඇත්තේ පසුගිය ආණ්ඩු පාලන සමයේ කොළඹ සහ ඒ අවටින් පැහැරගනු ලැබූ 11 දෙනකු නාවික හමුදා කඳවුරු වල රඳවා ගෙන වධහිංසා කොට අතුරුදහන් කිරීම සම්බන්ධයෙන් අවශ්‍යව සිටි ලුතිනන් කොමදෝරු චන්දන ප්‍රසාද් හෙට්ටිආරච්චිට අධිකරණයෙන් වසං වී සිටීමට ආරක්ෂක මාණ්ඩලික ප්‍රධානී අද්මිරාල් රවින්ද්‍ර විජේගුණරත්න අනුබල දුන් බවට රහස් පොලිසිය විසින් වාර්තා කරනු ලැබීමෙන් පසු ය.

දෑවුරුද්දකට වැඩි කාලයක් යුක්තිය මගහැර සිටි වරෙන්තුකරුවකු වන සැකකරු අගෝස්තු 14 දා කොළඹදී අත් අඩංගුවට ගැනීමට පෙර රහසිගතව විදේශගත කිරීම සඳහාද හිටපු නාවික හමුදාපති වශයෙන් සිටි අද්මිරාල් වරයා ආධාර කළ බව රහස් පොලිසිය විසින් දැනුම් දී තිබුනි.

ලුතිනන් කොමදෝරු හෙට්ටිආරච්චි අත් අඩංගුවට ගැනීම සඳහා විවෘත වරෙන්තුවක් නිකුත් කර ඇතැයි  හිටපු නාවික හමුදාපතිවරයාට දැනුම් දී තිබියදීත් ඔහු විසින් සැකකරු සඟවාගෙන සිටි බව අපරාධ පරීක්ෂණ දෙපාර්තමේන්තුව අධිකරණයට වාර්තා කර සිටියේය.

ලක්ෂ පහක් 

හිටපු නාවික හමුදාපතිවරයා විසින් ලුතිනන් කොමදෝරුවරයා සඟවා තබාගත් බව නාවික සුබ සාධන අධ්‍යක්ෂ කොමදෝරු ලසන්ත ගමගේ හා සැකකරුගේ කඳවුරු භාරව සිටි කපිතාන් නිශාන්ත අමරෝසා විසින් ප්‍රකාශ කර ඇතැයි අපරාධ පරීක්ෂණ දෙපාර්තමේන්තුවේ සමූහ මංකොල්ල විමර්ශන අංශයේ ස්ථානාධිපති, ප්‍රධාන පොලිස් පරික්ෂක නිශාන්ත සිල්වා අධිකරණයට දැනුම් දී තිබේ.

ලුතිනන් කොමදෝරු ලක්සිරි ගීතාල්ගේ ප්‍රකාශයක් උපුටා දක්වමින් පොලිස් පරීක්ෂක වරයා අධිකරණයට දැනුම් දුන් පරිදි  චන්දන ප්‍රසාද් හෙට්ටිආරච්චි අධිකරණය මගහැර සිටි සමයේ අද්මිරාල් රවි විජේගුණරත්න විසින් ඔහුට රුපියල් පන්ලක්ෂයක්ද ලබා දී තිබේ.

කරුණු විමසා බැලීමෙන් අනතුරුව ආරක්ෂක මාණ්ඩලික ප්‍රධානි අද්මිරාල් රවි විජේගුණරත්න අත් අඩංගුවට ගෙන අධිකරණය හමුවට පැමිණවීමට අවසර දුන් කොළඹ කොටුව මහේස්ත්‍රාත් ලංකා  ජයරත්න, උසාවි ගෙන ආ සැකකාර ලුතිනන් කොමදෝරු චන්දන ප්‍රසාද් හෙට්ටිආරච්චි සැප්තැම්බර් 12 දක්වා නැවතත් බන්ධනාගාර ගත කරන ලෙස නියෝග කළාය.

මේ අතර නඩු විභාගයට සහභාගි වෙමින් ඒ සම්බන්ධයෙන් අධිකරණයේදී සහ ඉන් පිටත අදහස් පල කිරීමට  සැකකරුවන් කිසිවකුත් නීතිඥ මේජර් අජිත් ප්‍රසන්නට උපදෙස් දී නැති බව ඔවුන් වෙනුවෙන් පෙනී සිටින ජනාධිපති නීතිඥ අනුජ ප්‍රේමරත්න නියෝජනය කරමින් නීතිඥ කල්ප පෙරේරා මහේස්ත්‍රාත්වරියට දැනුම් දී තිබේ.

Related posts

Comments are closed.

Top