සමාජ මාධ්‍යයට මුහුණ දීමට අගමැති ජාත්‍යන්තර ආරක්ෂක ජාලයකට අත වනයි | VIDEO

යුද්ධයේ ස්වභාවය සම්ප්‍රදායික අවි ගැටුමේ සිට අන්තර් ජාලය කරා මාරුවී ඇතැයි පවසන ශ්‍රී ලංකාවේ අග්‍රාමාත්‍යවරයා ෆේස්බුක් සහ ට්විටර් ඇතුළු සමාජ මාධ්‍ය වල “තර්ජනයට” මුහුණ දීම සඳහා ශක්තිමත් ආරක්ෂක ජාලයක් ස්ථාපිත කරගැනීමට ජාත්‍යන්තර යුද සමුළුවකට යෝජනා කර සිටී.

ජගත් යුද විශේෂඥයන්ගේ සහභාගිත්වයෙන් කොළඹ බණ්ඩාරනායක අනුස්මරණ ජාත්‍යන්තර සම්මන්ත්‍රණ ශාලාවේ “ගෝලීය වියවුල් හමුවේ දේශයේ සුරක්ෂාව” යන තේමාව යටතේ දෙදිනක් පුරා පවත්වනු ලබන “2018 ආරක්ෂක සමුළුවේ” සමාරම්භක දේශනය පවත්වමින් අගමැති රනිල් වික්‍රමසිංහ විසින් සමාජ මාධ්‍ය හඳුන්වනු ලැබුවේ “ගෝලීය කඩාකප්පල්කාරී බලවේග” ලෙසයි.

ස්වාභාවික ආපදා, දේශගුණික විපර්යාස, පුද්ගලයන් රට හැරයාම හා උන්හිටිතැන් අහිමි වීම, ප්‍රචණ්ඩ රාජ්‍ය නොවන බලවේග, වාර්ගිකත්වය, නුතන මතවාද සහ රැඩිකල් ආගමික මත යනාදී සියල්ල “ප්‍රචණ්ඩ අන්තවාදයේ අවදානමකට මගපාදන 21 වැනි සියවසේ ආරක්ෂාවට ඇති තර්ජන” ලෙස අගමැතිවරයා විසින් නම් කරන ලදී.

ආණ්ඩුව දැඩි විවේචනයට ලක් කරන සමාජ මාධ්‍ය ජාල වලට ශ්‍රී ලංකාවේ රාජ්‍ය නායකයන් කිහිපවර තර්ජනය කර ඇති අතර වෙබ් අඩවි කිහිපයකට ද මේ වනවිට රට තුල තහංචි පනවා තිබේ.

“සමාජ මාධ්‍ය ඇතුළු තාක්ෂණය යොදාගන්නා නූතන මාධ්‍ය සම්ප්‍රදායික නොවන තවත් තර්ජනයකි,” යි අගමැති රනිල් වික්‍රමසිංහ ආරක්ෂක සමුළුවේදී අවධාරණය කළේය.

“ෆේස්බුක්, ට්විටර් වැනි සමාජ මාධ්‍ය අඩවි සහ අන්තර්ජාලයේ ඇති වෙනත් වෙබ් අඩවි ද ගෝලීය කඩාකප්පල්කාරී බලවේග බවට පත්වෙමින් සිටී. ටියුනීසියාව හා ඊජිප්තුව වැනි රටවල් සම්බන්ධයෙන් ගත් කල ජාතීන් අස්ථාවර කොට බරපතල වෙනස්කම් ඇති කිරීමට මෙම නව මාධ්‍යයට ඇති හැකියාව අපි දැක ඇත්තෙමු.”

අගමැතිවරයා විසින් නම් රටවල් දෙකම මේ සියවසේ පළමු දශකය අග උතුරු අප්‍රිකාව හා මැද පෙරදිග කැළඹු අරාබි වසන්තයෙන් පීඩාකාරී පාලකයන් පලවා හල දේශයන්ය.

එහිදී බටහිර මැදිහත්වීම පෙරටු කොටගත් සමාජ මාධ්‍ය ද විශාල දායකත්වයක් දරන ලදී.

ජාතික සහ ජාත්‍යන්තර ආරක්ෂාවට එල්ලවී තිබෙන අනතුරේ ස්වභාවය සංකීර්ණ බවට බිය පලකළ අගමැති රනිල් වික්‍රමසිංහ ඊට මුහුණ දීම සඳහා “සකලවිධ බහුජාතික සහයෝගිතාවක්” අවශ්‍ය වන්නේ යැයි අවධාරණය කර සිටියේය.

 

Related posts

Comments are closed.

Top