පෝරකයට අලුතින් පිරිස් පෙළ ගැස්සීමට ජනපති සැරසෙයි | VIDEO

හතලිස් අවුරුද්දක් තිස්සේ අක්‍රියව පැවති එල්ලුම් ගස නැවත ක්‍රියාත්මක කරන බවට සහතික වී ඇති ජනාධිපතිවරයා මෙතෙක් මරණීය දණ්ඩනය නියම නොකෙරුනු වැරදිකරුවන් මරා දැමීම සඳහාද නීති සම්පාදනය කිරීමට සූදානම් වෙයි.

රාජ්‍ය අංශයේ සිදුවන දූෂණය, නාස්තිය හා සොරකම සම්බන්ධයෙන් ද අලුතින් මරණ දඬුවම පැනවීම සඳහා වන තම අභිලාශය ජනාධිපති විසින් හෙළි කෙරුනේ අගමැති හා කතානායක දෙපල ද සහභාගී වූ රාජ්‍ය උත්සවයකදීය.

මත්ද්‍රව්‍ය ජාවාරම සම්බන්ධයෙන් වරදකරුවන් වන පුද්ගලයන් පෝරකයට නැංවීමට රජය විසින් පසුගිය මාසයේ ගන්නා ලද තීන්දුව දේශීය හා ජාත්‍යන්තර වශයෙන් හෙලා දැකීමට ලක් වී තිබුණත් ජනාධිපතිවරයා මරණ දඬුවම තවත් පුළුල් කිරීම සඳහා නීති සම්මත කර ගන්නා මෙන් පාර්ලිමේන්තුවෙන් ඉල්ලා සිටියේය.

“ගරු අගමැති තුමනි, ගරු කතානායක තුමනි, මම මේ පාර්ලිමේන්තුවේ සියලු දේශපාලන පක්ෂ වලින් අද මේවගේ වැදගත් කාර්යයක් ඉෂ්ඨ කරන වෙලාවේ ඉල්ලීමක් කරනවා  මේ රටේ රාජ්‍ය දේපළ හොරකමට දූෂණයට නීතියට ඇතුළත් කළ යුතුයි මරණීය දණ්ඩනය,” යනුවෙන් ජනාධිපති මෛත්‍රිපාල සිරිසේන කියා සිටියේ පාර්ලිමේන්තුවේ ගිණුම් කාරක සභාව විසින් 5 අඟහරුවාදා  පාර්ලිමේන්තු සංකීර්ණයේ පවත්වන ලද රාජ්‍ය ආයතන අගයන සම්මාන ප්‍රදානොත්සවයකට එක් වෙමිනි.

අපරාධ ගණනාවක් සඳහා මරණ දණ්ඩනය ක්‍රියාත්මක කෙරෙන බව ප්‍රකාශ කළ ජනාධිපතිවරයා දූෂණය නාස්තිය සහ සොරකම ට දඬුවම් දීම සඳහා මෙතෙක් පැවැති නීති රීති වල අඩුපාඩුකම් ඇතැයි කියා සිටියේය.

චීනය හා සිංගප්පූරුව වැනි රටවල නඩු ඇසීමට අවුරුදු ගණන් කල් ගත කිරීමෙන් තොරව මරණිය දණ්ඩනය දී “වැඩේ ඉවර කරන” බව ඔහු සඳහන් කළේය.

දුෂණ වංචා චෝදනා විභාග කරන ජනාධිපති කොමිසන් සභා වලින් වරදකරුවන් කරන පුද්ගලයන්ට “මහජනයාට පෙනී යන ආකාරයෙන්” කඩිනමින් දඬුවම් කිරීම මගින් රාජ්‍ය ආයතන ශක්තිමත්  කර ගත හැකිවනු ඇති බවට ජනාධිපතිවරයා විශ්වාසය පල කළේය.

වරදකරුවන් මරා දැමීමෙන් අපරාධ අඩු නොවන බව ශ්‍රී ලංකාවේ මානව හිමිකම් කොමිසම ඇතුළු දේශීය හා ජාත්‍යන්තර සංවිධාන විසින් කරුණු සහිතව පෙන්වා දී තිබේ.

Related posts

Comments are closed.

Top