ජනපතිට යුද අපරාධ චෝදනා නගමින් නිව්යෝර්ක් නුවර දෙමළ උද්ඝෝෂණ | VIDEO

එක්සත් ජාතීන්ගේ මහා මණ්ඩලය අමතන ශ්‍රී ලංකාවේ ජනාධිපතිවරයාට යුද අපරාධ චෝදනා නගමින් දෙමළ පිරිස් විරෝධතාවක් පවත්වා තිබේ.

විරෝධතාව සංවිධානය කළ පාරජාතික දෙමළ ඊළම් ආණ්ඩුව එක්සත් ජාතීන්ගේ නියෝජිතයන්ට සංදේශයක් භාර දෙමින් ඉල්ලා ඇත්තේ දෙමළ ජනතාවට එරෙහිව සිදු කරන අද අපරාධ සම්බන්ධයෙන් යුක්තිය ඉටු කිරීමට අසමත් වී තිබෙන ශ්‍රී ලංකාවේ රජය ජාත්‍යන්තර අපරාධ අධිකරණයට යොමු කරන ලෙසයි.

යුද සමයේ වැඩ බලන ආරක්ෂක ඇමැති වශයෙන් රාජකාරි කළ බව ජනාධිපති මෛත්‍රිපාල සිරිසේන පිළිගෙන ඇති හෙයින් මරා දමන ලද දහස් සංඛ්‍යාත දෙමළ වැසියන් සම්බන්ධ වගකීමෙන් බැඳෙන බව එක්සත් ජාතීන්ගේ සංවිධානයේ ප්‍රධානීන්ට සහ රාජ්‍ය නායකයන්ට ඔවුන් විසින් යවන ලද පනිවුඩයක දැක්වේ.

“විසිඑක්වැනි සියවසේ පළමු වර්ග සංහාරය” ලෙස මුල්ලිවයික්කාල් ජනඝාතනය හැඳින්වූ පාරජාතික දෙමළ ඊළම් ආණ්ඩුවේ අගමැති වශයෙන් කටයුතු කරන විශ්වනාදන් රුද්‍රකුමාරන් විරෝධතාවයට එක්වෙමින් මාධ්‍යවේදීන්ට කියා සිටියේ එය මියන්මාරය සහ සිරියාව ඇතුළු රටවල දියත් කෙරෙන අනිකුත් වර්ග සංහාර වලට පූර්වාදර්ශයක් සපයා ඇති බවයි.

එක්සත් ජාතීන්ගෙන් යුක්තිය ඉල්ලා සිටි විරෝධතා කරුවෝ ශ්‍රී ලංකාව “ත්‍රස්තවාදී රාජ්‍යයක්” ලෙසත් ජනාධිපතිවරයා “යුද අපරාධකරුවකු” ලෙසත් හෙලා දකින සටන් පාඨ හඬ නැගූහ.

Related posts

Comments are closed.

Top