‘නැවත පදිංචි කිරීමේ ප්‍රායෝගික ගැටලුවලට මුල්තැන දෙන්න’ජනපති

සේයා: ජනාධිපති මාධ්‍ය ඒකකය

සේයා: ජනාධිපති මාධ්‍ය ඒකකය

යුද්ධයෙන් අවතැන් වූ උතුරු සහ නැගෙනහිර පළාත්වල ජනතාව නැවත පදිංචි කිරීම සම්බන්ධයෙන් මතුව ඇති ප‍්‍රායෝගික ගැටලුවලට ප‍්‍රමුඛත්වය දෙමින් විසඳුම් යෝජනා ඉදිරිපත් කරන ලෙස බලධාරීන්ට ජනාධිපති මෛත‍්‍රීපාල සිරිසේන  විසින් උපදෙස් ලබා දී තිබේ.

ජනාධිපතිවරයා මෙම උපදෙස් ලබා දුන්නේ  11 වන බදාදා  පස්වරුවේ ජනාධිපති ලේකම් කාර්යාලයේදී පැවති උතුරු නැගෙනහිර පළාත්වල නැවත පදිංචි කිරීම් සම්බන්ධයෙන් පැවති සාකච්ජාවේදී  බව රජය පවසයි.

උතුරු සහ නැගෙනහිර පළාත්වල ආණ්ඩුකාරවරුන්ගේ ප‍්‍රධානත්වයෙන් සහ ඒ ඒ පළාත් නියෝජිතයන්ගෙන් සමන්විත නැවත පදිංචි කිරීමේ කමිටුවක් ඉදිරි සති දෙක තුළ රැස්වී ඒ ඒ පළාත්වල මතුව ඇති ගැටලු පිළිබඳ සොයා බලන ලෙසත්, දිස්ත‍්‍රික් ලේකම්වරුන්ගේ වාර්තා මත පමණක් පදනම් නොවී පළාත් මට්ටමින් පැමිණෙන ගැටලු සහ යෝජනා නැවත පදිංචි කිරීමේ අමාත්‍යවරයාගේ ප‍්‍රධානත්වයෙන් රැස්වෙන ජාතික කම්ටුවේදී සාකච්ජා කොට විසඳුම් යෝජනාවලියක් තමා වෙත ඉදිරිපත් කරන ලෙසත් ජනාධිපති විසින් උපදෙස් ලබා දී ඇතැයි වාර්තා වේ.

උතුරු සහ නැගෙනහිර පළාත් වල අවතැන් වූ ජනතාව නැවත පදිංචි කිරීමසම්බන්ධයෙන්  ප‍්‍රායෝගිකව මතුවන ගැටලු සොයා බලා විසදුම් සැපයීම මෙම සාකච්ජාවේ අරමුණ වි ඇත.

ඩී.එම්. ස්වාමීනාදන්, ලක්ෂ්මන් කිරිඇල්ල, රිෂාද් බදුයුදීන්, මහින්ද අමරවීර, සජිත් පේ‍්‍රමදාස, රවුෆ් හකීම්, රාජිත සේනාරත්න, පාඨලී චම්පික රණවක යන අමාත්‍යවරුන්  සමග උතුරු පළාත් ආණ්ඩුකාර එච්.එම්.ජී.එස්. පලිහක්කාර, නැගෙනහිර පළාත් ආණ්ඩුකාර ඔස්ටින් ප‍්‍රනාන්දු, රාජ්‍ය ඇමති රුවන් විජේවර්ධන, නියෝජ්‍ය ඇමති දුනේෂ් ගන්කන්ද, නැගෙනහිර පළාත් මහ ඇමති නසීර් අහමඞ්, උතුරු පළාත් ඇමති ආචාර්ය පී. සත්‍යලිංගම් ඇතුලු පිරිසක්ද අමාත්‍යාංශ ලේකම්වරු, දිස්ත‍්‍රික් ලේකම්වරු සහ අදාළ ආයතනවල නියෝජිතයින් ද මෙම සාකච්ඡාවට සහභාගී වූ බව රජය පවසයි.

 

Related posts

Comments are closed.

Top